Mannauður og menning

Í upphafi árs 2022 féllu fjöldatakmarkanir loks úr gildi og gat allt starfsfólk komið saman á vinnustaðnum að nýju. Eftir rúm tvö ár í fordæmalausu ástandi var starfsfólk þakklátt að geta hitt alla vinnufélagana aftur augliti til auglitis og má með sanni segja að mikill metnaður og kraftur hafi fylgt í kjölfarið.

Lögð var rík áhersla á það að styrkja tengslin og eiga virkt samtal við hvern og einn starfsmann. Þannig stóðu Heiðar Guðjónsson, fyrrverandi forstjóri, og Alda Sigurðardóttir, mannauðsstjóri, til að mynda fyrir fundarröð á vormánuðum þar sem allt starfsfólk var hvatt til að greina frá sinni sýn á félagið, þjónustuna og fyrirtækjamenninguna. Fundunum var svo fylgt eftir með viðhorfskönnun þar sem þau sem ekki komust á fundina gátu komið sínum hugleiðingum á framfæri. Fundirnir sem voru 10 talsins mæltust vel fyrir og var strax farið að vinna úr hugmyndum og ábendingum sem komu fram. Það var ánægjulegt að heyra samhljóminn innan fyrirtækisins og að almennt ríkir mikil ánægja og virðing á meðal starfsfólks. Það telur vinnuumhverfið gott og er ánægt með þann sveigjanleika sem í boði er. Auk fundanna voru regluleg starfsmannasamtöl tekin upp að nýju. Þá voru framkvæmdar reglulegar púlsmælingar á meðal starfsfólks í gegnum HR Monitor sem heilt yfir komu vel út og í samanburði við önnur fyrirtæki sem nýta sér þá þjónustu mældist Sýn yfir meðallagi þegar kemur að starfsánægju.

Út frá þessu virka samtali við starfsfólk í gegnum árið er unnið að aðgerðaráætlun til þess að skapa framúrskarandi fyrirtækjamenningu innan félagsins til framtíðar.

Sýn er umhugað um heilsu starfsfólks og er rík áhersla lögð á að huga að andlegri og líkamlegri heilsu starfsfólks. Árlega veitir félagið hverjum starfsmanni heilsustyrk sem ætlað er að hvetja starfsfólk til heilsueflingar. Árið 2022 þáðu 190 starfsmenn heilsustyrk frá félaginu. Þá veitir félagið einnig samgöngustyrk hverjum þeim sem nýtir sér vistvænar samgöngur til og frá vinnu en samgöngustefna félagsins miðar meðal annars að því að stuðla að heilbrigðari lífsháttum starfsfólks, draga úr mengun og minnka umferðarálag. Árið 2022 þáðu að meðaltali 36 starfsmenn samgöngustyrk í hverjum mánuði. Við höfuðstöðvarnar er einnig upphituð hjólageymsla, góð búningsaðstaða og núvitundarherbergi sem starfsfólk getur nýtt við hverskyns heilsueflingu.

Félagið er einnig í samstarfi við fjölmarga aðila sem veita starfsfólki sérsniðna þjónustu eftir þörfum. Þar má til dæmis nefna sálfræðiþjónustu, markþjálfun og almenna heilbrigðisþjónustu. Félagið hefur þannig milligöngu um að koma starfsfólki sínu fljótt og örugglega að hjá sérfræðingum á hverju sviði eftir því sem við á og/eða niðurgreiðir þjónustuna.

Sýn metur allt starfsfólk að verðleikum og leggur sig fram við að allir njóti jafnra tækifæra á vinnustaðnum. Mikil áhersla er lögð á að auka hlut kynjanna í þeim störfum þar sem kynjaskekkja er ráðandi. Í jafnréttisstefnu félagsins kemur fram að leitast er við að gæta fyllsta jafnréttis kynjanna og þess er gætt að starfsfólki sé ekki mismunað.

Venju samkvæmt fór félagið í gegnum endurvottun á jafnlaunakerfinu á vormánuðum þar sem óútskýrður launamunur á milli kynja var kannaður. Niðurstöðurnar voru afar ánægjulegar en óútskýrður launamunur var aðeins 0,6% konum í vil en var 0,6% körlum í vil árið 2021. Markmið félagsins er áfram að vera með 0% launamun og verður haldið áfram að vinna að því marki árið 2023.

UNI er regnhlífarhugtak sem nær yfir allt fræðslustarf innan Sýnar. Með UNI vill félagið tryggja góða og samræmda grunnþjálfun starfsfólks um leið og félagið veitir starfsfólki sérhæfða þjálfun og fræðslu sem hentar starfi hvers og eins.

Því til viðbótar býður UNI reglulega upp á gagnleg námskeið og fyrirlestra sem eflir starfsfólk bæði í leik og starfi.

Á árinu var rík áhersla lögð á stjórnendaþjálfun með það að markmiði að efla hvern og einn stjórnanda, veita þeim góð og gagnleg verkfæri til að takast á við þá ábyrgð og verkefni sem standa frammi fyrir hverjum stjórnanda og samhæfa vinnubrögð þvert á félagið.

Mikið er lagt upp úr góðum anda á vinnustaðnum, jákvæðum samskiptum og því að hafa gaman í vinnunni. Boðleiðir eru stuttar og starfsfólk hjálpast að við að ná settum markmiðum.

Innan fyrirtækisins starfar öflugt starfsmannafélag sem stendur reglulega fyrir viðburðum fyrir starfsfólk og fjölskyldur þeirra en auk þess eru fjölmargir klúbbar starfræktir á meðal starfsfólks til dæmis hjólahópur, hlaupahópur, royalistafélag og gönguhópur svo fátt eitt sé nefnt.